4 - UNITY

Balangkas ng Kurikulum

Ang Good Manners and Right Conduct at Values Education (GMRC at VE) ay isang pangunahing asignatura (core subject) sa Programa ng Batayang Edukasyon ng K to 12, alinsunod sa Republic Act No. 11476 o GMRC and Values Education Act.

Ang Good Manners and Right Conduct (GMRC) o Kabutihang Asal at Wastong Pag-uugali ay tumutukoy sa tiyak at partikular na tinatanggap na mga batayang panlipunang pagpapahalaga, etiketa, at/o tamang paraan ng pag-uugali na nagpapahayag ng paggalang sa mga taong nakakasalamuha.

Samantala, ang Values Education (VE) o Edukasyon sa Pagpapahalaga ay tumutukoy sa proseso na nagbibigay-daan sa pag-internalisa ng mga pagpapahalaga ng kabataan. Layunin nito na matutunan ng mga mag-aaral ang mga etikal na saligan ng mga prinsipyo, kasama ang kakayahang kumilos batay sa mga prinsipyong ito, at ang napatibay na disposisyon na gawin ang mga ito.

Ituturo ang GMRC sa mga mag-aaral sa Baitang 1 hanggang 6 bilang pangunahing asignatura at integrated din ito sa Kindergarten. Ang Values Education naman ay ituturo sa mga mag-aaral sa Baitang 7 hanggang 10 bilang pangunahing asignatura rin, samantalang integrated dito ang pagtuturo ng GMRC. Ang time allotment ay kapareho o magkatulad ng ibang pangunahing asignatura (Section 4, RA 11476).